سر الدكتور حكاوي كاتبة حور حمدان
رجعت من عند الدكتور وانا إيديا وصوابعي في حالة غريبة... كنت حاسة إني شايلة كابوس في إيدي.
فضلت أعيط لحد ما فتحت باب الشقة ولقيت سهى أختي في وشي. ابتسمتلها بصعوبة وحاولت أداري إيديا ودخلت على أوضتي فورا.
ثبت الموبايل على المكتب وصورت إيديا وبعتها فورا.
قبل ما أضغط إرسال بصيت على الصورة نظرة أخيرة
كانت صوابعي عاملة زي ما تكون حد نحت فيها خطوط والعضم باين بطريقة مش طبيعية كأن الجلد بيشف من عليه.
النتوءات اللي طالعة تحت الجلد شكلها كأنه في حاجة بتتحرك جواه... مرعب مش منظر بني آدم.
مكنتش عارفة رد فعل معتز هيكون إيه بس كنت مضطرة أبعت.
خدت نفس عميق وكتبتله تحت الصورة وانا إيديا بترتجف
شايف يا معتز الدكتور المجنون عمل فيا إيه
بعد حوالي خمس دقايق رد عليا كان باين عليه الصدمة
أعوذ بالله دي إيد شيطان ولا إيه! إيه المنظر ده يا حور!
اتجاهلت الكلمة اللي جرحتني زي سكينة وكتبتله
مش عارفة بس انت هتنزل من السفر إمتى عشان نحدد الفرح
كنت مستنياه يقول أي كلمة تطمنني تجبر بخاطري
بس اللي قاله وقع عليا زي الطوبة
فرح إيه بمنظر إيدك ده مفيش فرح وإنتي كده
مصيبة !
حاجة أنا ماليش ذنب فيها تبقى مصيبة!
كتبتله وأنا بترعش من الحزن
يعني إيه يا معتز
رد بسرعة من غير ما يفكر
يعني مش هتجوز جن!
قلبي اتقطع قفلت الموبايل وقعدت أعيط بانهيار...
دخلت سهى عليا الأوضة ولأول مرة لقيتها بتضحك بشماتة وقالتلي
وأخيرا لقيتك بتعيطي
بصيتلها مسحت دموعي وقلت بوجع
سهى أنا مش ناقصة بالله عليكي اطلعي برا.
سهى خرجت من الأوضة وهي بتضحك وضحكتها كانت عاملة زي الخبطة على جرح لسه بيسيل دم.
قمت بسرعة وقعدت قدام المراية قلعت البانديج اللي الدكتور حطه على إيديا.
كنت فاكرة إني مستعدة بس اللي شوفته خلاني أرجع لورا بخضة.
صوابعي كأنها بتتحرك لا مش بتتحرك فعلا بس في حاجة جوة الجلد بتتموج كأنها نبض مش طبيعي كأن في حاجة عايشة جوايا!
جسمي كله اتنفض وقمت أدور في شنطتي على أي حاجة أرجع بيها للدكتور على الأقل أفهم إيه ده!
لقيت ورقة صغيرة متنية جوه الشنطة مكان ما الدكتور حطلي المرهم.
فتحتها بأيد مرتعشة
الورقة كانت مكتوب فيها بخط شبه منحوت وحروف غريبة معرفش أقراها...
بس كان في كلمتين بالعربي تحتهم مكتوبين باللون الأحمر
يتبع
سر_الدكتور
حكاوي_كاتبة
حور_حمدان
حقيقي عارفة ان مقصرة بس عصب عني
اوعدكم ان شاء الله ان كلها اسبوع ومش هنزل غير اسكربتات كاملة
وان شاء الله التكملة هنزلها بكرة بدري ع قد ما اقدر وحقكم عليا كمان مرة دعواتكم ليا اعدي امتحاناتي ع خير
